16 نومبر 2025

تحریر

اسلام گل


گزشتہ بارہ اکتوبر سے پاکستان اور افغانستان کے درمیان کشیدہ تعلقات کے باعث پانچ اہم سرحدی گزرگاہیں— طورخم، خرلاچی، غلام خان، انگور اڈہ اور چمن— تجارت اور لوگوں کی آمدورفت کے لیے مکمل طور پر بند ہیں۔ اس کشیدگی نے نہ صرف دوطرفہ تجارت کو شدید نقصان پہنچایا ہے بلکہ پاکستان کے پیداواری شعبے کو بھی مالی بحران کا سامنا ہے۔

صنعتکاروں کو درپیش مشکلات

فیضان احمد گزشتہ بیس سال سے حیات آباد انڈسٹریل اسٹیٹ میں ماچس کی فیکٹری چلا رہے ہیں۔ ان کی تیار کردہ مصنوعات افغانستان، وسطی ایشیائی ممالک اور روس تک برآمد ہوتی تھیں، لیکن اب سرحدی گزرگاہوں کی بندش نے ان کے مالی مسائل میں بے پناہ اضافہ کر دیا ہے۔

فیضان احمد کہتے ہیں: “حیات آباد انڈسٹریل اسٹیٹ سمیت صوبے کے دیگر علاقوں میں قائم صنعتوں کا انحصار افغانستان اور وسطی ایشیائی ممالک کو برآمدات پر ہے۔ ہم نے آرڈرز کے مطابق مال تیار کیا ہے لیکن راستوں کی بندش سے اسے بھیجنا ممکن نہیں ہو رہا۔”

افغان طالبان کا سخت موقف

افغان طالبان کے نائب وزیرِ اعظم برائے اقتصادی امور ملا عبدالغنی برادر نے حال ہی میں پاکستان کے ساتھ تجارت کے بارے میں سخت موقف اختیار کیا ہے۔ انہوں نے افغان تاجروں کو ہدایت دی ہے کہ وہ پاکستان پر انحصار کم کریں اور آئندہ تین ماہ میں متبادل تجارتی راستے تلاش کریں۔

ملا برادر کا کہنا ہے: “پاکستان بار بار سرحدیں بند کر کے افغان تجارت کو نقصان پہنچاتا ہے اور ایسے حالات میں مستحکم کاروبار ممکن نہیں۔” انہوں نے پاکستانی ادویات کے معیار پر بھی شدید تنقید کی اور ان کی درآمد بند کرنے کی ہدایت دی۔

ملا برادر نے واضح کیا کہ اگر پاکستان تجارت جاری رکھنا چاہتا ہے تو اسے مضبوط اور قابلِ اعتماد یقین دہانیاں دینی ہوں گی کہ مستقبل میں سرحدیں بلاجواز بند نہیں کی جائیں گی۔

پاکستان کا ردِ عمل

ملا غنی برادر کے بیان کے جواب میں پاکستان کے وزیرِ دفاع خواجہ آصف نے کہا کہ اگر افغانستان پاکستان کے راستے تجارت کم یا بند کرتا ہے تو یہ پاکستان کے لیے نقصان کی بجائے فائدہ ہوگا۔

خواجہ آصف کے مطابق افغان تجارت کا ایران، ترکی یا ترکمانستان کی جانب منتقل ہونا پاکستان کے لیے “خوش آئند” ہے کیونکہ اس سے سرحد پر دباؤ کم ہوگا، اسمگلنگ اور دہشت گردی کے خطرات میں بھی کمی آئے گی۔

انہوں نے کہا: “بڑی مقدار میں افغان سامان کراچی بندرگاہ کے ذریعے آتا ہے مگر دراصل پاکستان ہی میں فروخت ہوتا ہے، اس لیے اس رجحان کے ختم ہونے سے پاکستان کو معاشی نقصان نہیں ہوگا۔”

ادویہ ساز صنعت بھی متاثر

خیبر پختونخوا کے مختلف علاقوں میں ڈھائی سو تک ادویات تیار کرنے والے کارخانے کام کر رہے ہیں۔ کامران خان حیات آباد انڈسٹریل اسٹیٹ میں ایک ادویہ ساز کمپنی میں منیجر کے طور پر کام کرتے ہیں۔

کامران خان کہتے ہیں: “پاکستان میں تیار ہونے والی ادویات کے لیے افغانستان ایک بہترین مارکیٹ ہے، تاہم تجارت میں مسائل کے باعث یہ شعبہ شدید مالی مشکلات کا شکار ہے۔” ان کا کہنا ہے کہ دونوں ممالک کو دوطرفہ تجارت میں آسانیاں پیدا کرنے کی ضرورت ہے تاکہ برآمدات میں اضافہ ہو اور ملکی خزانے کو فائدے کے ساتھ ساتھ مقامی لوگوں کو روزگار کے مواقع میسر آئیں۔

تاجر برادری کے خدشات

تاجر رہنماؤں کا کہنا ہے کہ پاکستان اور افغانستان کے درمیان تجارتی سرگرمیوں کا متاثر ہونا دونوں ممالک کے لیے نقصان کا باعث بنے گا۔ خیبر پختونخوا میں صنعتیں پہلے ہی بدامنی اور دہشت گردی سے متاثر ہیں، اور اب افغانستان کے ساتھ تجارت کی بندش سے پیداواری یونٹس کے مسائل میں مزید اضافہ ہو رہا ہے۔

تاجر رہنما محمد ولی کا کہنا ہے: “چند سال پہلے صرف ماچس کے ستر ہزار کارٹن برآمد ہوتے تھے جن میں سے زیادہ تر افغانستان اور وسطی ایشیائی ممالک کو بھیجے جاتے تھے۔ تاہم بار بار سرحدوں کی بندش اور دوطرفہ تجارت میں مسائل کے باعث یہ مقدار کئی گنا کم ہو چکی ہے۔”

ان کا کہنا ہے کہ دوطرفہ تجارت کو نقصان پہنچنے سے دونوں ممالک متاثر ہوں گے کیونکہ صنعتی اور زرعی اجناس کی درآمدات اور برآمدات کے لیے دونوں ممالک ایک دوسرے کے قریب اور آسان منڈیاں ہیں۔

ہزاروں افراد کی بے روزگاری کا خطرہ

محمد ولی کے مطابق خیبر پختونخوا کی صنعت پہلے سے دہشت گردی اور بدامنی سے متاثر ہے اور افغانستان کو برآمدات بند ہونے سے نہ صرف کارخانہ دار بلکہ ہزاروں مزدور بھی بے روزگار ہونے کے خطرے سے دوچار ہیں۔

موجودہ وقت میں سرحد کے دونوں جانب پانچ ہزار مال بردار گاڑیاں کھڑی ہیں، جبکہ افغان تاجروں کا دعویٰ ہے کہ تجارتی سامان کے بارہ ہزار کنٹینر پاکستان میں پھنسے ہوئے ہیں۔

تجارتی اعداد و شمار

پاکستان اور افغانستان کے درمیان تجارت گزشتہ بارہ اکتوبر سے مکمل طور پر معطل ہے۔ دستیاب اعداد و شمار کے مطابق:

– گزشتہ مالی سال پاکستان کی افغانستان کو برآمدات 1.4 ارب ڈالر تھیں

– افغانستان سے پاکستان کی درآمدات 61 کروڑ ڈالر ریکارڈ کی گئیں

– افغانستان گزشتہ سال پاکستان کی 8ویں بڑی برآمدی منڈی تھا

– رواں مالی سال میں برآمدات میں 31 فیصد اضافہ دیکھا گیا تھا

– غیر رسمی تجارت شامل کی جائے تو پاکستان کی اصل برآمدات سرکاری اعداد و شمار سے کہیں زیادہ ہیں

چمن بارڈر سے روزانہ 300 کے قریب ٹرک پاکستانی مصنوعات لے کر افغانستان جاتے تھے، جبکہ واپسی میں آنے والی گاڑیوں کی تعداد بہت کم تھی۔ پاکستان کا افغانستان کی اجناس کی مارکیٹ میں حصہ پہلے 95 فیصد تھا جو بھارت کی مداخلت کے بعد کم ہو کر 65 فیصد رہ گیا۔

دوسری جانب افغان ٹرانزٹ ٹریڈ کا حجم مالی سال 2023 میں 6.5 ارب ڈالر سے زائد تھا جو 2024 میں کم ہو کر 2.3 ارب ڈالر اور 2025 میں مزید گھٹ کر 1 ارب ڈالر رہ گیا۔ افغانستان سے پاکستان کی سب سے اہم درآمد اعلیٰ معیار کا کوئلہ ہے، جو کم فاصلے کے باعث جلد پہنچ جاتا ہے۔

مجموعی طور پر یہ اعداد و شمار ظاہر کرتے ہیں کہ تجارت کی بندش نہ صرف دونوں ممالک کی معیشتوں کے لیے نقصان دہ ہے بلکہ مارکیٹ شیئر میں مزید تبدیلیوں کا خطرہ بھی بڑھ گیا ہے۔ ماہرین کے مطابق سیاسی کشیدگی کے باوجود دونوں ممالک کو اقتصادی مفادات کو مدِنظر رکھتے ہوئے تجارتی تعلقات بحال کرنے کی ضرورت ہے۔

LEAVE A REPLY

Please enter your comment!
Please enter your name here